Նախորդ օրը Paparazzi.am կայքը ներկա գտնվեց մի չափազանց պոզիտիվ, գունագեղ և ուրախ միջոցառման: Սոֆի Դևոյանի Մշակույթի կենտրոնի, ինչպես նաև Զարուհի Բաբայանի երգի ստուդիայի սաները հերթական հաշվետու համերգով զարմացրեցին իրենց ծնողներին: Ինչպես պարզեցինք զրույցի ընթացքում, նման համերգներ կենտրոնը կազմակերպում է տարին երեք անգամ Երևան քաղաքի տարբեր թատրոններում, բայց հունիսի 18–ին ներկաները ամառային տաք երեկոն լցրեցին ծափահարություններով Ջրաշխարհը, քանի որ այս անգամ համերգը տեղի ունեցավ հենց այնտեղ:
Մեկ անգամ ևս համոզվեցինք, որ Սոֆի Դևոյանը հավատարիմ է իր ձեռագրին, քանի որ չենք կարող հիացմունք չարտահայտել նրա ներկայացրած մանրակրկիտ աշխատանքի նկատմամբ. խմբերի հագուստները, երեխաների սանրվածքները, կազմակերպված ելույթները, նույնիսկ փոքրիկների դեմքի արտահայտությունը խոսում էր այն մասին, որ նրանք քաջ գիտակցում են ինչ պարեր են պարում, իսկ պարերը շատ տարբեր էին: Հանդիսատեսը դրանց միջոցով հայտնվեց աշխարհի տարբեր երկրներում, ծանոթանալով դրանց մշակույթին, քանի որ, կարծում ենք, պարն իսկապես մշակույթը ներկայացնելու լավագույն միջոցներից մեկն է:
