Մանկական զարգացման հիմնադրամը կազմակերպել էր <<Հունիսի 1-ը և տարվա բոլոր օրերն երեխաների օրերն են>> խորագրով միջոցառում: Մանկական զարգացման հիմնադրամի երեխաները հունիսի 1-ին ստեղծեցին իրենց Հայաստանը և հավաքեցին մեր երկրի քարտեզի խճանկարը: Գեղեցիկ անակնկալներ, վառ գույներ, ջերմություն և սեր, իսկ մեր սիրելի Լիդուշիկը ուրախացրեց իր գեղեցիկ կատարումներով:

Միջոցառմանը մասնակցեցին մոտ 150 երեխաներ և ծնողներ: Երեխաները մասնագետների օգնությամբ նկարեցին խճանկարի փոքրիկ կտորների վրա, որից հետո հավաքեցին ՀՀ քարտեզը: Տարբեր փոքրիկ ծրագրերով հանդես եկան աճպարարներ, ծաղրածուներ, ինչպես նաև ելույթ ունեցավ ՄԶՀ-ի պարային համույթը և Լիդուշիկը:

Միջոցառմանը ներկա էին հիմնադրամի ընկերներ՝ սպորտի վարպետներ, աշխարհի և Եվրոպայի չեմպիոններ՝ Նազիկ Ավդալյանը և Հռիփսիմե Խուրշուդյանը:

Հիմնադրամի նպատակն էր այդ օրը ներառականության գաղափարը առավել լայն տարածելի դարձնելը և հավաստիացնելը, որ յուրաքանչյուր երեխա իր ներուժի չափով կարող է ներդրում ունենալ ու երջանիկ ապրել:

Մանկական զարգացման հիմնադրամը ստեղծվել է 2009թ. սեպտեմբերին: Հիմնադրամը նախկինում` 2002թ-ից գործել է որպես Մանկական զարգացման կենտրոն Վորլդ Վիժն Հայաստանի ՙՆերառական կրթության՚ ծրագրի շրջանակներում, 2004-2008թթ. ՄԶԿ-ն ներգրավված է եղել ՙԴժվար իրավիճակում գտնվող երեխաներ՚ ծրագրում, որն ուղղված էր կյանքի դժվարին իրավիճակներում հայտնված երեխաների և նրանց ընտանիքների աջակցությանը: 2002-2008թթ. ընկած ժամանակահատվածում կենտրոնում տարբեր ծառայություններ է ստացել ավելի քան 500 երեխա: Կազմակերպվել են սեմինարներ, վերապատրաստման դասընթացներ ինչպես ծնողների, այնպես էլ երեխաների պաշտպանության, կրթական և համայնքային զարգացման ոլորտում աշխատող մասնագետների համար:

Ներկայումս, Մանկական զարգացման հիմնադրամի նպատակն է նպաստել երեխաների և նրանց ընտանիքների իրավունքների պաշտպանությանը, նրանց առողջ զարգացմանը և խոցելի խմբերի ներառմանը հասարակություն, առաջարկել մասնագիտական ծառայություններ` աջակցելով խոցելի խմբերի երեխաներին և նրանց ընտանիքներին, նպաստել մեթոդաբանական բազայի հարստացմանը` մշակելով նյութեր երեխաների հետ աշխատող մասնագետների, մանկավարժների, ծնողների համար: Լրացուցիչ տեղեկությունների համար այցելեք www.cdf.am

Մանրամասն տեղեկությունների համար դիմել`

Արտյոմ Հախնազարյանին

+ 37491199080

{gallery height=115 crop=1 maxcount=222}event/2017/worldvision17{/gallery}