Երևանի Պետական բժշկական Համալսարանի հրավերով Հայաստանում էր Նորին Արքայական Մեծություն, Հորդանանի արքայադուստր Դինա Մայրեդը: Մի շարք պաշտոնական և կարևոր հանդիպումներից հետո, մեկնելուց մի քանի ժամ առաջ Հորդանանի արքայադուստրն այցելեց նաև Երևանի Փ. Թերլեմեզյանի անվան գեղարվեստի պետական քոլեջ: «ՎԻՏԱՄԻՆ ՍԵՐ»-ը, ինչպես կոչեց նրան հայ հասարակությունը, անձամբ ձեռքով բարևեց ներկա գտնվող բոլոր ուսանողներին: Թեև Արքայադուստրը չափից դուրս խիտ և հագեցած ժամանակացույցից և մասնավորապես Ցեղասպանության թանգարան-ինստիտուտ այցելությունից հետո հոգնած էր և թախծոտ, տեսնելով Հայաստանի նոր սերնդի լավագույն ներկայացուցիչների աշխատանքները, ոգևորությամբ շրջեց ցուցասրահով: Իսկապես հիացած էր, և պարբերաբար ճշտում էր ուսանողների տարիքը` համարելով աշխատանքները հասուն և կայացած: Նորին Արքայական Մեծությունը, ով անմիջական և հմայիչ կին է, կանգ առավ մի ստեղծագործության առջև, որտեղ պատկերված է աթոռի վրա նստած, հոգնած մի կին: «Այս կինն ինձ նման է»,- ժպտալով շշնջաց նա և ասաց, որ լինելով երեք զավակի մայր, նա երեկոյան ժամերին հենց այդ տեսքն է ունենում: Քոլեջի տնօրեն Աննա Մնացականյանը Արքայադստերը սիրով նվիրեց «Հեթում Բ թագավորի Ճաշոց»-ից (1286 թ., Մատենադարան) մանրանկարի կրկնօրինակը` կատարված քոլեջի ուսանողուհի Անահիտ Սարոյանի կողմից: Այնուհետև, երբ ուսանողներն առաջարկեցին ընտրել հենց ցուցադրված աշխատանքներից որևէ մեկը, Տիկինը կրկին կանգ առավ «Հոգնածություն» կտավի մոտ: Հեղինակ Կիմա Գյարաքյանը մեծ սիրով նվիրեց իր ստեղծագործությունը Դինա Մայրեդին:

{gallery height=115 crop=1 maxcount=15}event/2017/vitaminser{/gallery}