Այսօր՝ մարտի 21-ին երևանցիներն ու քաղաքի հյուրերը մասնակցեցին յուրահատուկ բաղադրատոմսով պատրաստված աշխարհի ամենաերկար գաթայի համտես-հյուրասիրությանը:
4000 սմ երկարություն և 40 սմ լայնություն ունեցող աշխարհի ամենաերկար գաթան ներկայացված էր Տերյան 91 հասցեում՝ <<Պանդոկ Երևանի>> Տերյան մասնաճյուղի դիմացի հատվածի ողջ երկայնքով: Այն կշռում էր 240կգ, որը համարժեք է 300 սովորական գաթայի քաշին:
<<Պանդոկ Երևանը>> գործունեություն է ծավալում 2006 թվականից՝ ռեստորանային ոլորտում ներկայանալով խոհարարական ստեղծագործական և նորարար մոտեցումներով: «Պանդոկ Երևանի» առաքելությունն ազգային խոհանոցի, խոհարարական մշակույթի, վարպետության ավանդույթների պահպանումն ու զարգացումն է, հայկական ազգային խոհանոցի ճանաչելիության ապահովումը ինչպես Երևանցիների, այնպես էլ քաղաքի հյուրերի շրջանում:
Գաթան հայ ավանդական խոհանոցում առավել տարածված ու սիրված աղանդ է: Հնուց ի վեր այն զարդարում է տոնական գրեթե բոլոր սեղաններն ու հաջողություն և երջանկություն խորհրդանշում: Գաթան պատրաստում էին առավելապես տոնական կամ ծիսական առիթներով` Նոր տարի, Բարեկենդան, Տերնդեզ, հարսանեկան ծիսակատարությունների, հյուրասիրությունների, տոնական այցելությունների դեպքում: Տարբեր շրջաններում ընդունված էին գաթայի պատրաստման տարբեր եղանակներ` կլոր, եռանկյունի, քառակուսի, լուսնաձև, իսկ չափերը կարող էին լինել տարբեր՝ մեծ կամ փոքր:
